ഓര്‍ക്കുക നാം ആകാശത്താണ്!!

ആകാശ യാത്രകള്‍ ക്രമാതീതമായി വര്‍ദ്ധിച്ചതോടെ വിമാന ദുരന്തങ്ങളും അടിക്കടി ഉണ്ടായിക്കൊണ്ടിരിക്കുന്നുവെന്നത് സമീപകാല സംഭവങ്ങള്‍ സാക്ഷിയാണ്.

ആകാശത്തിലൂടെയാണ് നാം സഞ്ചരിച്ചുകൊണ്ടിരിക്കുന്നതെന്നും അത്തരം ഒരു യാത്രയില്‍ ഉണ്ടായിരിക്കേണ്ട മര്യാദകളും നിയമങ്ങളും പാലിക്കണമെന്നുമുള്ള ബോധം എല്ലാവര്ക്കും ഉണ്ടാവേണ്ടതുണ്ട്. 

വളരെ ചെറിയ പിഴവുകള്‍ കാരണം നൂറുകണക്കിന് യാത്രക്കാര്‍ ഞൊടിയിടയില്‍ കത്തിയമര്‍ന്ന് കരിക്കട്ടകളായി മാറുമ്പോള്‍ വലിയ അപകടങ്ങളില്‍നിന്ന് അത്ഭുതകരമായി രക്ഷപ്പെടുന്ന സംഭവങ്ങളും നിരവധി.

അനന്ത വിഹായുസ്സിലേക്ക് നിറയെ യാത്രക്കാരുമായി പറന്നുയരുന്ന വിമാനങ്ങളിലെ ചില യാത്രക്കാര്‍ തങ്ങള്‍ ഭൂമിയില്‍ വെച്ച് ചെയ്യാന്‍ മടിക്കുകയും ഭയക്കുകയും ചെയ്യുന്ന കാര്യങ്ങള്‍ മാനത്ത് വെച്ച് ചെയ്യുന്നു. ആര്‍ത്തിയോടെയുള്ള പരസ്യമദ്യപാനം, വിമാനത്തിലെ പ്രത്യേക യാത്രനിര്‍ദ്ദേശങ്ങള്‍ പാലിക്കാതെ സഹ യാത്രക്കാരോടും വിമാന ജോലിക്കാരോടുമുള്ള മോശമായ പെരുമാറ്റം, വര്ഷങ്ങളോളം നാടുപിടിക്കാൻ കാത്തിരിക്കുന്നവർക്ക്‌ ഏതാനും നിമിഷങ്ങൾ കാത്തിരിക്കാൻ ക്ഷമയില്ലാതെ ലാന്റിംഗിനു മുമ്പേ ചാടി എണീറ്റ് ബാഗേജു എടുത്തു പുറത്തു പോകാനുള്ള ധൃതി, സീറ്റ് ബെൽറ്റ് ഉപയോഗിക്കാതെയുള്ള യാത്ര  തുടങ്ങിയ കാര്യങ്ങളിൽ അശ്രദ്ധരാണ് പലരും. 

സ്വബോധം പോലും നഷ്ടപ്പെടുത്തി അന്തസ്സും അഭിമാനവും കളഞ്ഞുകുളിച്ചു ചെയ്യുന്ന ഇത്തരം അരുതാഴ്മകൾ കാണുമ്പോള്‍ ചില വിമാന ദുരന്തങ്ങളിൽ യാത്രക്കാർക്ക് സംഭവിക്കുന്ന നഷ്ടങ്ങളും പരിക്കുകളും സ്വയം ചോദിച്ചു വാങ്ങുകയാണോ എന്ന് തോന്നിപ്പോകുന്നു. 

Visit and LIKE

Face Book Page

https://www.facebook.com/Janasamakshamblog/

#Janasamaksham W.App Groups: 00966507588672

#കോവിഡ് 19 : മത സംഘടന കൂട്ടായ്മകളും ഇടപെടണം

#കോവിഡ്-19 മഹാമാരി വലിയൊരു ഭീഷണിയായി ലോകമാകെ പടർന്നുകൊണ്ടിരിക്കുമ്പോൾ പ്രവാസലോകത്ത് രോഗികൾ, ഗർഭിണികൾ, തൊഴിൽ നഷ്ടപ്പെട്ടവർ, വിസ കാലാവധി കഴിഞ്ഞവർ തുടങ്ങിയവരൊക്കെ എങ്ങിനെയെങ്കിലും നാടണയാനുളള മാർഗ്ഗങ്ങളും തെരഞ്ഞു നടക്കുകയാണ്.

പ്രതിസന്ധി ഘട്ടങ്ങളിൽ സഹായിക്കുമെന്ന് പ്രതീക്ഷയുണ്ടായിരുന്ന കേന്ദ്ര - സംസ്ഥാന സർക്കാറുകൾ അനുദിനം #പ്രവാസികളെ കഷ്ടത്തിലാക്കുന്ന നിയമങ്ങളാണ് പ്രഖ്യാപിച്ചുകൊണ്ടിരിക്കുന്നത്.

ഗൾഫിന്റെ വിവിധ നാടുകളിൽ വ്യത്യസ്ത രീതിയിലുള്ള സജ്ജീകരണങ്ങളാണ് കോവിഡ് രോഗികൾക്ക് ഒരുക്കിയിട്ടുള്ളത്. നമ്മുടെ രാജ്യത്തോ മറ്റേതെങ്കിലും രാജ്യത്തോ ഉള്ള സജ്ജീകരണങ്ങൾ കണ്ടുഎല്ലാ രാജ്യങ്ങളിലും അതേപോലെയുണ്ടെന്നു അധികാരികൾ മനസിലാക്കിയതാണ് ആദ്യ തെറ്റ്.

#പ്രവാസികളുടെ പ്രശ്‌നം പരിഹരിക്കാൻ പ്രവാസികൾ മാത്രമേ ഉളളൂവെന്ന വികാരവും അവരെ വെറും വോട്ടുകുത്തികളും ഫണ്ട് പിരിവുകാരുമായി മാത്രമേ നേതാക്കളും ഭരണാധിപന്മാരും കാണുന്നുള്ളുവെന്ന യാഥാർഥ്യവും ഭൂരിഭാഗം പ്രവാസികളും മനസ്സിലാക്കി കഴിഞ്ഞിരിക്കുന്നു.

സാമൂഹ്യ ജീവിതത്തിലെ സാഹോദര്യ ബന്ധവും ഒരു സഹോദരന്‍റെ വിഷമം തീര്‍ത്തുകൊടുത്താല്‍ ലഭിക്കുന്ന പുണ്യത്തിന്റെ മികവും പഠിപ്പിച്ചുകൊടുക്കുന്ന മത സംഘടനകളുടെയും സ്ഥാപനങ്ങളുടെയും ഗള്‍ഫ് ചാപ്റ്ററുകള്‍, പ്രാദേശിക - സംയുക്ത മഹല്ല് കമ്മിറ്റികള്‍, റിലീഫ്‌ കൂട്ടായ്മകള്‍ തുടങ്ങിയ നൂറുകണക്കിന് സംഘടനകള്‍ മിക്ക ഗൾഫ് രാജ്യങ്ങളിലും വ്യവസ്ഥാപിതമായി പ്രവര്‍ത്തിച്ചു വരുന്നുണ്ട്. ഒരു വേള രാഷ്ട്രീയ സംഘടനകളേക്കാള്‍ പതിന്മടങ്ങ് വിഭവ ശേഷിയും ഭദ്രതയും ഗൾഫിലെ സര്‍ക്കാർ, സർക്കാറിതര കേന്ദ്രങ്ങളിലും സ്വാധീനമുള്ളവരുമാണ് പല സംഘടനകളും. നാടിന്റെ നട്ടെല്ല് എന്ന് വിശേഷണമുള്ള പ്രവാസികളുടെ വിയർപ്പിന്റെ നല്ലൊരു ഭാഗം നാട്ടിലെ മത സാമൂഹ്യ വിദ്യാഭ്യാസ മേഖലകൾക്കും കിട്ടിയിട്ടുണ്ട് എന്നതും മറക്കാതിരിക്കുക.

കേന്ദ്ര-സംസ്ഥാന സർക്കാരുകളുടെ വികലമായ ചിന്തകളും നയങ്ങളും തിരുത്തിപ്പിക്കാനും പ്രായോഗികമായ കാര്യങ്ങളിലൂടെ ഈ പ്രതിസന്ധിഘട്ടങ്ങളിൽ നിന്നും പ്രവാസി സമൂഹത്തെ രക്ഷിക്കാൻ മേല്പറഞ്ഞ സംഘടനകൾക്കും ബാധ്യതയുണ്ട്.

(Published in Malayalam News 20-06-2020)

Visit and LIKE

#Janasamaksham Face Book Page:
https://www.facebook.com/Janasamakshamblog/

#Janasamaksham Blog:

http://janasamaksham.blogspot.com/
W. + Mob: +966507588672

വിനയപൂർവ്വം
#അൻവർ #വടക്കാങ്ങര
ബെയ്‌സ് - ജിസാൻ
മൊബൈൽ:+96650758867

മഅ്ദനി : പരമോന്നത കോടതിക്കും ഉത്തരം മുട്ടുന്നു.

നിയമ,നീതി,ന്യായ വ്യവസ്ഥകള്‍ തുടരെ തുടരെ ലംഘിച്ചുകൊണ്ടു മഅ്‌ദനിയുടെ രണ്ടാം ജയില്‍വാസം ഏഴാം വര്‍ഷത്തിലേക്ക് കടക്കുകയാണ്.

കോയമ്പത്തൂര്‍ ബോംബ് സ്‌ഫോടന കേസില്‍ ഒമ്പതര വര്ഷം വിചാരണ തടവുകാരനായി പീഡിപ്പിച്ചതിനു ശേഷം വെറുതെ വിട്ടെങ്കിലും 2010 ആഗസ്റ്റ്‌ മുതല്‍ ബാങ്ക്ലൂര്‍ ബോംബ് സ്‌ഫോടന കേസില്‍  പ്രതിയാക്കി പീഡിപ്പിക്കുകയാണ് കര്‍ണാടക സര്‍ക്കാര്‍.

ബാങ്ക്ലൂര്‍ കേസിലും ശിക്ഷിക്കാന്‍ തക്ക തെളിവില്ലാത്തതിനാല്‍ അനിശ്ചിതമായി കേസ് നീട്ടി കൊണ്ടുപോകാനും മരണംവരെ പീഡിപ്പിക്കാനുമുളള തന്ത്രങ്ങളുടെ ഭാഗമാണ് ജാമ്യാപേക്ഷകള്‍ക്കും വ്യവസ്ഥകള്‍ക്കും അവ നടപ്പാകുന്നതിലും കേട്ടുകേള്‍വിയില്ലാത്ത നിബന്ധനകളിലൂടെ അദ്ദേഹത്തെ കഷ്ടപ്പെടുത്തുന്നത്. 280 പേരുള്ള സാക്ഷിപട്ടികയിലെ സത്യംപറയുന്നവരെ ഒഴിവാക്കിയും മറ്റുള്ളവരെ സ്വാധീനിക്കാനും പോലീസും പ്രോസിക്യൂഷനും കിണഞ്ഞു ശ്രമിച്ചുകൊണ്ടിരിക്കുകയാണ്.

കോയമ്പത്തൂര്‍ സ്ഫോടന കേസില്‍ വിധി പറഞ്ഞപ്പോള്‍ രാജ്യത്തെ പരമോന്നത കോടതി ചോദിച്ചു ''എന്ത് തെളിവിന്റെ പേരിലാണ് നിങ്ങൾ ഇദ്ദേഹത്തെ ഇത്രകാലം തടവിലിട്ടത്
''

1998ല്‍ മഅ്‌ദനിയെ അറസ്റ്റ് ചെയ്യാൻ നിർദ്ദേശിച്ച ഐജിയോട് അന്ന് കൊച്ചി സിറ്റി പോലീസ് കമ്മീഷണര്‍ ആയിരുന്ന ജേക്കബ് തോമസും ചോദിച്ചിരുന്നു ''എന്ത് തെളിവിന്റെ പേരിലാണ് ഞാൻ മഅ്‌ദനിയെ അറസ്റ്റ് ചെയ്യേണ്ടത്''.

ഏഴു വര്ഷമായി വിചാരണ തടവുകാരനായി തടവിലിട്ടിരിക്കുന്ന ഒരാളുടെ സുരക്ഷ ചെലവ് ആരുടെ ഉത്തരവാദിത്വം ആണ്? തടവുകാരന്റെയോ അതോ സര്‍ക്കാരിന്‍റെയോ? പരമോന്നത നീതിപീഠത്തിനുപോലും ഉത്തരം മുട്ടിയ ചോദ്യം
.

പ്രശസ്തനായ ഒരു വക്കീലിനെ കേസ് വാദിക്കാന്‍ ഏല്പ്പി്ച്ചതാണ് വിചാരണ തടവുകാരന്‍റെ സുരക്ഷയുടെ ചെലവ് പ്രതിയുടെ കണക്കില്‍പ്പെടുത്താന്‍ സുപ്രീംകോടതി കണ്ടെത്തിയ ന്യായം
.

എന്നാല്‍ തന്റെ നിരപരാധിത്വം ഒരിക്കല്‍ കൂടി തെളിയുമെന്ന ശുഭപ്രതീക്ഷയോടെ, എല്ലാ വിളക്കുകളും കെട്ടുപോയിട്ടില്ലെന്ന ഉറച്ച വിശ്വാസത്തോടെ അബ്ദുല്‍ നാസര്‍ മഅ്‌ദനി നമ്മുക്കിടയില്‍ ഒരു ചോദ്യചിഹ്നമായി നിലകൊള്ളുന്നു. (Published in G.  Madhyamam 5 Aug 2017)  

 

പ്രവാസി വകുപ്പ്ര് ലയനം സംഘപരിവാർ  അജണ്ട?

110ഓളം രാജ്യങ്ങളിലായി രണ്ട് കോടിയോളം വരുന്ന ഇന്ത്യക്കാര്‍ അധിവസിക്കുന്ന നാടുകളില്‍ അവര്‍ നേരിടുന്ന വിവിധങ്ങളായ പ്രയാസങ്ങളും പ്രതിന്ധികളും പരിഹരിക്കപ്പെടുന്നതിനുവേണ്ടിയാണ് പന്ത്രണ്ട് വര്‍ഷം മുമ്പ് കേന്ദ്ര സര്‍ക്കാറിന്റെ കീഴില്‍ പ്രത്യേകമായ ഒരു മന്ത്രാലയം രൂപീകരിച്ചത്.

എന്നാല്‍ പ്രസ്തുത വകുപ്പിന്‍റെ കീഴില്‍ നാളിതുവരെ നടത്തിയ പ്രവര്‍ത്തനങ്ങള്‍ ആശാവഹമായിരുന്നില്ല എന്ന കാരണത്താല്‍ ആ വകുപ്പ് തന്നെ നിര്‍ത്തലാക്കി വിദേശകാര്യ മന്ത്രാലയത്തിലേക്ക് ലയിപ്പിച്ചുകൊണ്ടാണ്  മോദി സര്‍ക്കാര്‍ പ്രവാസികള്‍ക്ക് പുതുവത്സര സമ്മാനം നല്‍കിയത്.

ചുരുങ്ങിയ കാലം കൊണ്ടും സമയം കൊണ്ടും രാജ്യങ്ങളില്‍ നിന്നും രാജ്യങ്ങളിലേക്ക് പാറിപ്പറന്നു റിക്കാര്‍ഡിടാനുള്ള “പ്രയാണ മന്ത്രിയുടെ” കൈപ്പിടിയില്‍ ഒതുക്കി നിര്‍ത്തിയ വിദേശകാര്യ വകുപ്പ് കാബിനറ്റ്‌ മന്ത്രിയായ സുഷമ സ്വരാജിന് കാര്യമായ ജോലിയെന്നും ഇല്ലത്രേ. അതിനാലാണോ പ്രവാസികാര്യ വകുപ്പിന്‍റെ ചുമതലകള്‍ കൂടി വിദേശകാര്യ മന്ത്രാലയത്തിലേക്ക് മാറ്റിയത്.

കേന്ദ്ര വിദ്യാഭ്യാസ വകുപ്പിലും മറ്റും മോദി സര്‍ക്കാര്‍ നടപ്പാക്കിക്കൊണ്ടിരിക്കുന്ന  സംഘപരിവാര്‍ ഒളിയജണ്ടകള്‍ പോലെ പ്രവാസികാര്യ വകുപ്പ് പിരിച്ചുവിട്ട് വിദേശകാര്യവകുപ്പില്‍ ലയിപ്പിച്ചതിനറെ പിന്നിലെ ആര്‍.എസ്.എസ്. ഗൂഡതന്ത്രങ്ങള്‍ എന്തൊക്കെയാണെന്ന് കാത്തിരുന്നു കാണാം.

(Published in Gulf Madhyamam 16-1-16)

അന്നം തരുന്ന നാടിനെ അപകീര്‍ത്തിപ്പെടുത്തുന്നു.

അന്നം തരുന്ന നാടിനെ അപകീര്‍ത്തിപ്പെടുത്തുന്നു.

സൗദി അറേബ്യയുടെ തെക്കന്‍ മേഖലയിലെ ഷുഖൈഖിലേക്ക് പുതിയ വിസയില്‍ ജോലിക്കെത്തിയ ഹരിപ്പാട്‌ സ്വദേശികളായ മൂവര്‍ സംഘത്തിലെ കാര്‍ത്തികപ്പള്ളി ബൈജുവിനെ തന്‍റെ സ്പോണ്‍സര്‍ അക്രമിക്കുന്നതിന്റെ വീഡിയോ ക്ലിപ്പിംഗ് സോഷ്യല്‍ മീഡിയയും ദേശീയ മാധ്യമങ്ങളും പതിവുപോലെ ആഘോഷിച്ചു. വിഷയം  വലിയ ചര്‍ച്ചയായതോടെ മുഖ്യമന്ത്രിയുടെ നിര്‍ദ്ദേശപ്രകാരം കോണ്‍സുലേറ്റ് ഉദ്യോഗസ്ഥരും സാമൂഹ്യ പ്രവര്‍ത്തകരും ചേര്‍ന്ന് കഴിഞ്ഞ ദിവസം മൂന്നുപേരെയും നാട്ടിലേക്ക് കയറ്റിവിടുകയും ചെയ്തു.. എന്നാല്‍, സംഘപരിവാര്‍ ബന്ധമുള്ള ഒരു പ്രവാസി കൂട്ടായ്മയുടെയും നാട്ടിലെ ഒരു മാധ്യമ പ്രവര്‍ത്തകന്‍റെയും നിര്‍ദ്ദേശങ്ങളനുസരിച്ചു ബൈജു ആസൂത്രണം ചെയ്ത നാടകമായിരുന്നത്രേ ഇതെല്ലാം.

ദിവസങ്ങളോളം ജോലിക്കെത്താതിരിക്കുകയും ഫോണ്‍ വിളിച്ചാല്‍ മറുപടി പറയാതിരിക്കുകയും ചെയ്തതോടെ അവരുടെ പ്രശ്നങ്ങള്‍ സൗദിയിലേക്ക് കൊണ്ടുവന്ന ഏജന്റുമായി ചര്‍ച്ച ചെയ്തു പിരിഞ്ഞ ശേഷം മൂന്ന് പേരും സ്പോണ്സറുടെ ഓഫീസ് പരിസരത്ത് തന്നെ നില്‍ക്കുകയും ആളൊഴിഞ്ഞ സമയം നോക്കി സ്പോണ്‍സറെ ചീത്ത വിളിച്ചും മറ്റുമായി പ്രകോപിപ്പിക്കുകയുമായിരുന്നു. സ്പോണ്‍സര്‍  ആത്മരക്ഷാര്‍ത്ഥം അവരെ ആട്ടിയോടിക്കുന്ന രംഗം മറ്റൊരാള്‍ മുന്‍ തീരുമാനമനുസരിച്ച് മൊബൈലുപയോഗിച്ചു വീഡിയോവില്‍ പകര്‍ത്തുകയായിരുന്നു.

ഇന്ത്യക്കാരടക്കം നിരവധി വിദേശ തൊഴിലാളികളുമായി ഇരുപത്തിയഞ്ച് വര്‍ഷമായി സ്ഥാപനം നടത്തുന്ന അബ്ദുല്ല അല്‍ ബാറക്കിയെകുറിച്ച് ശുഖൈക്കില്‍ മലയാളികള്‍ക്കാര്‍ക്കും  ഒരു പരാതിയുമില്ല. രണ്ട് വര്ഷം മുമ്പ് ജോലിക്കിടയില്‍ അപകടത്തില്‍ മരിച്ച മാര്‍ത്താന്ടം സ്വദേശിയടക്കമുള്ള മൂന്നുപേരുടെ കുടുംബത്തിന് അബ്ദുല്ല ബാറക്കി മാസം തോറും സഹായധനം അയച്ചു കൊടുക്കുന്നയാളാണ് ബാറക്കി.


പുതുതായി ജോലിക്ക് വന്ന ഇവരുടെ തൊഴില്‍  കരാര്‍ രണ്ട് വര്ഷം എന്നുള്ളത് ഒരു വര്‍ഷമായി ചുരുക്കുകയും ശമ്പളം ഇരുനൂര്‍ റിയാല്‍ കൂട്ടിക്കൊടുക്കാനും എജന്റുമായുള്ള ചര്‍ച്ചയില്‍ തീരുമാനമായിരുന്നു. പക്ഷേ, നാട്ടിലേക്ക് സൗജന്യമായി പോവാനുള്ള ബൈജുവിന്‍റെ ഗൂഡതന്ത്രമാണ് കനിച്ചനല്ലൂര്‍ സ്വദേശികളായ വിമല്‍ കുമാര്‍, അഭിലാഷ് എന്നിവര്‍ക്കും തിരിച്ചു പോരേണ്ടി വന്നത്.

മരുഭൂമിയില്‍ ആട് ജീവിതം നയിക്കുന്നവര്‍ മുതല്‍ സ്വന്തമായി ബിസിനസ് സ്ഥാപനങ്ങള്‍ കെട്ടിപ്പടുത്തവരും വലിയ കമ്പനികളുടെ ഉന്നത സ്ഥാനത്തിരിക്കുന്നവരടക്കം മുപ്പതു ലക്ഷത്തോളം ഇന്ത്യക്കാര്‍ ജോലി ചെയ്തുകൊണ്ടിരിക്കുന്ന ഒരു നാടിനെ അപകീര്‍ത്തിപ്പെടുത്താനുള്ള ശ്രമമാണ് സംഘപരിവാര്‍ പോലുള്ള സംഘടനകളുടെ സഹായത്തോടെ നടന്നുകൊണ്ടിരിക്കുന്നത്. നാട്ടിലെത്തിയവരെ സ്വീകരിക്കാന്‍ ബിജെപി സംസ്ഥാന പ്രസിഡന്‍റടക്കമുള്ള നേതാക്കള്‍ വിമാനത്താവളത്തിലും വീട്ടിലുമെത്തിയത് വെറുതെയല്ല.

(PUBLISHED IN THEJAS DAILY 13-1-15)

യു.എ.യില്‍ മോദിക്ക് വേണ്ടത് അമ്പലമായിരുന്നു!

നരേന്ദ്ര മോദി ഇന്ത്യന്‍ പ്രധാനമന്ത്രിയായി അധികാരമേറ്റ പതിനഞ്ചു മാസത്തിനിടയില്‍ രണ്ട് ഡസനിലധികം വിദേശ രാഷ്ട്രങ്ങള്‍ സന്ദര്‍ശനം നടത്തിക്കഴിഞ്ഞുവത്രേ. ഇരുപത്തിയഞ്ച് ലക്ഷത്തിലധികം ഇന്ത്യക്കാര്‍  ജോലിയെടുത്തു കഴിയുന്ന യു.എ.ഇയിലേക്ക് കഴിഞ്ഞാഴ്ച  നടത്തിയ രണ്ട് ദിവസത്തെ സന്ദര്‍ശനം തന്‍റെ ആദ്യത്തെ ഗള്‍ഫ് സന്ദര്‍ശനം എന്നതിലുപരി കഴിഞ്ഞ മുപ്പത്തിനാല് വര്‍ഷത്തിനിടയില്‍ രാജ്യം ഭരിക്കാന്‍ അവസരം ലഭിച്ച എട്ടു പ്രധാനമന്ത്രിമാര് ഉപയോഗപ്പെടുത്താത്ത അവസരമാണ് മോദി തന്‍റെ  യു.എ.ഇ സന്ദര്‍ശനത്തിലൂടെ സാധിച്ചെടുത്തത്. ഏറെ കാലത്തെ കാത്തിരിപ്പിന് ശേഷം എത്തുന്ന  തങ്ങളുടെ പ്രധാനമന്ത്രിയുടെ സന്ദര്‍ശനമെന്നനിലക്ക് പ്രവാസികള്‍ കാലങ്ങളേറെയായി മുറവിളികൂട്ടിക്കൊണ്ടിരിക്കുന്ന ജീവല്‍പ്രശ്നങ്ങളെ  കുറിച്ച് ഒരക്ഷരം പോലും ഉരിയാടാതെ അവഗണിച്ചത് ദുബൈ ക്രിക്കറ്റ് സ്റ്റേഡിയത്തില്‍ വെച്ച്  നടത്തിയ പൊതുപരിപാടിയിലേക്ക് ആവേശപൂര്‍വ്വം എത്തിച്ചേര്‍ന്ന ആയിരക്കണക്കിന് പ്രവാസികളെ നിരാശരാക്കി. മോദിയുടെ സന്ദര്‍ശനത്തോടനുബന്ധിച്ചു ദുബൈയിലെ വിവിധ മീഡിയകള്‍ പ്രവാസികളില്‍ നിന്ന് അഭിപ്രായങ്ങളും നിര്‍ദേശങ്ങളും സ്വരൂപിച്ചതും വെറുതെയായി. എന്നാല്‍ സംഘപരിവാര്‍ രക്തം ധനികളിലൂടെ ഒഴുകുന്ന നരേന്ദ്രമോദി യു.എ.ഇ മണ്ണില്‍ ഒരമ്പലം തരപ്പെടുത്താന്‍ മറന്നതുമില്ല.

നൂറ്റാണ്ടുകളോളം മുസ്ലിംകള്‍ ആരാധന നിര്‍വഹിച്ചുകൊണ്ടിരുന്ന സ്വന്തം രാജ്യത്തെ ബാബറി മസ്ജിദ് പൂട്ടാനും പൊളിക്കാനും കൂട്ടിനിന്ന നരേന്ദ്രമോദിക്കും മറ്റു ഹിന്ദുത്വ ഭീകരന്മാര്‍ക്കും യു.എ.ഇ ഭരണാധികാരികളുടെ മധുരമായ പ്രതികാരമാണ് അമ്പലം പണിയാനുള്ള അവസരത്തിലൂടെ നല്കിയത്. (Published in G.Madhyamam 23-8-15)

‘മധുരമെന്‍ മലയാളം’ പദ്ധതി തുടരണം

കേരള സര്‍ക്കാറിന്റെ കീഴിലെ മലയാളം ഭാഷ ഇന്‍സ്റ്റിറ്റ്യൂട്ട് പോലുള്ള വിവിധ വകുപ്പുകളുടെ സഹകരണത്തോടെ വിദേശ മലയാളി വിദ്യാര്‍ഥികള്‍ക്ക് വേണ്ടി ഗള്‍ഫ് മാധ്യമം സംഘടിപ്പിച്ച ‘മധുരമെന്‍ മലയാളം’ പദ്ധതി ശ്രദ്ധേയവും അവസരോചിതവുമായ പരിപാടിയാണ്.

എന്‍റെ ഗള്‍ഫ് ജീവിതത്തിനിടയില്‍ ഏറെ അത്ഭുതപ്പെടുത്തുകയും സഹതാപം തോന്നുകയും ചെയ്ത ചില കാര്യങ്ങള്‍ ഈ അവസരത്തില്‍ ഓര്‍ത്തുപോകുന്നു. ഉന്നത വിദ്യാഭ്യാസം നേടി മള്‍ട്ടി നാഷണല്‍ കമ്പനികളിലും മറ്റും ഉയര്‍ന്ന തസ്തികകളില്‍ ജോലിചെയ്യുന്ന മുസ്ലിം സഹോദരന്മാരില്‍ ചിലര്‍ക്ക് വിശുദ്ധ ഖുര്‍ആനിന്റെ അവസാന അദ്ധ്യായങ്ങള്‍ പോലും തെറ്റുകൂടാതെ പാരായണം ചെയ്യാനറിയില്ല. അതേപോലെ ആംഗലേയ ഭാഷയുടെ അതിപ്രസരമില്ലാതെ മലയാളം നന്നായി സംസാരിക്കാനോ സ്വന്തം പേരുപോലും തെറ്റില്ലാതെ എഴുതുവാനോ അറിയാത്ത വിദ്യാര്‍ഥികള്‍ മാത്രമല്ല മുതിര്‍ന്നവരെയും കാണാന്‍ കഴിഞ്ഞിട്ടുണ്ട്. പത്തും പന്ത്രണ്ടും ക്ലാസുകളിലെ പഠനം കഴിഞ്ഞ് ‘ഉപരിപഠനാര്‍ത്ഥം’ നാട്ടിലേക്ക് പോകുന്ന കുട്ടികളില്‍ ചിലര്‍ക്ക് ബസ്സിന്റെ ബോര്‍ഡുപോലും വായിക്കാന്‍ സാധിക്കാതെ പ്രയാസപ്പെടുന്നു.

അതിനാല്‍ മധുരമെന്‍ മലയാളം പദ്ധതി പതിവ്  കേെെമ്പന്‍ പരിപാടികള്‍ പോലെ പെട്ടന്ന് അവസാനിപ്പിക്കരുത്. പ്രവാസി സമൂഹത്തിന്‍റെ താഴെ തട്ടിലേക്ക് ഇറങ്ങിച്ചെന്ന് നവസാമൂഹ്യ മാധ്യമങ്ങളും മറ്റും ഉപയോഗപ്പെടുത്തി വിപുലമായ പ്രചാരണ പരിപാടികള്‍ നടത്തുകയും ‘മധുരമെന്‍ മലയാളം ക്ലബ്ബ്’ പോലുള്ള കൂട്ടായ്മകള്‍ രൂപീകരിച്ച് വിദ്യാര്‍ഥികള്‍ക്കും മുതിര്‍ന്നവര്‍ക്കും ഓണ്‍ലൈന്‍ വഴിയോ നേരിട്ടോ ക്ലാസ്സുകളും മറ്റും സംഘടിപ്പിച്ചു മാതൃഭാഷ പരിജ്ഞാനം പകര്‍ന്നു കൊടുക്കാനുള്ള കൂടുതല്‍ ശ്രമങ്ങള്‍ ഗള്‍ഫ് മാധ്യമത്തില്‍ നിന്നുണ്ടാകുന്നത് ഏറെ പ്രയോജനപ്പെടും. (PUBLISHED IN GULF MADHYAMAM 11 – 4 – 15)

ഈ മൌനം കോഴിക്കോടിന്റെെ ചിറകരിയും

കേന്ദ്ര എയര്‍പ്പോര്‍ട്ട് അതോറിറ്റി പ്രഖ്യാപിച്ച പദ്ധതിയനുസരിച്ച് കോഴിക്കോട് വിമാനത്താവളത്തില്‍ വരുന്ന മേയ് ഒന്ന് മുതല്‍ മാസങ്ങളോളം നീണ്ടുനില്‍ക്കുന്ന റണ്‍വേ നവീകരണ പ്രവര്‍ത്തനത്തിന്‍റെ ഭാഗമായുള്ള യാത്രാനിയന്ത്രണങ്ങള്‍ ആരംഭിച്ചുകഴിഞ്ഞു. വലിയ വിമാനങ്ങള്‍ക്ക് നിരോധമേര്‍പ്പെടുത്തിയ അവസരം മുതലെടുത്ത്‌ മറ്റുള്ളവര്‍ തോന്നിയപോലെ നിരക്കുകള്‍ വര്‍ദ്ധിപ്പിച്ചുകൊണ്ടുള്ള കഴുത്തറുപ്പന്‍ മത്സരവും തുടങ്ങിക്കഴിഞ്ഞു.

ഇതര ഗള്‍ഫ് രാജ്യങ്ങളില്‍ നിന്നും വ്യത്യസ്തമായി വ്യോമഗതാഗതം ഉപയോഗപ്പെടുത്തി മാത്രം  നാട്ടില്‍നിന്നും ലക്ഷക്കണക്കിന്‌ വിശ്വാസികള്‍ എത്തിച്ചേരുന്ന പുണ്യഭൂമികൂടിയാണ് സൗദി അറേബ്യ. വിസപുതുക്കുന്നതിനും മറ്റുമായി ഗള്‍ഫിലേക്ക് തിരിച്ചുവരാന്‍ വേനലവധി കാത്തിരിക്കുന്ന വിദ്യാര്‍ഥികളടക്കമുള്ള നൂറുകണക്കിന് പ്രവാസി കുടുംബങ്ങള്‍, റമദാന്‍, ഹജ്ജ് മാസങ്ങളില്‍ ഉംറക്കും ഹജ്ജിനുമായി പുണ്യഭൂമിയിലേക്ക് വരാന്‍ തയ്യാറെടുക്കുന്ന ലക്ഷക്കണക്കിന്‌ വിശ്വാസികള്‍  തുടങ്ങിയവര്‍ക്കൊക്കെ ഏറെ പ്രയാസവും സാമ്പത്തിക നഷ്ടവുമാണ് വലിയ വിമാനങ്ങള്‍ അവയുടെ സര്‍വീസ് നിര്‍ത്തിവെക്കുന്നതിലൂടെ സംഭവിക്കാന്‍ പോകുന്നത്. അതുകൊണ്ടുതന്നെ ഈ യാത്രാ പ്രശ്നത്തിന് ഇതര ഗള്‍ഫ് നാടുകളെക്കാള്‍ കൂടുതല്‍ സജീവമായി രംഗത്തിറങ്ങാന്‍ സൗദിയിലെ പ്രവാസി കൂട്ടായ്മകള്‍ക്ക്  ഏറെ ബാധ്യതയുണ്ട്.

  

തങ്ങള്‍ക്കിഷ്ടപ്പെട്ടവരെ മാത്രം ക്ഷണിച്ചുകൊണ്ടുള്ള ചില പൊതുപരിപാടികളും പ്രവാസി വിഷയങ്ങളില്‍ പതിവുപോലെ നടക്കാറുള്ള പ്രമേയ, പത്രപ്രസ്താവനകളുമാണ് സൗദിയിലെ വിവിധ ഭാഗങ്ങളില്‍ ഇപ്പോള്‍ നടന്നുകൊണ്ടിരിക്കുന്നത്. ഒന്നര മാസത്തിനു ശേഷം എയര്‍പ്പോര്‍ട്ട് അതോറിറ്റി അവരുടെ പദ്ധതികളുമായി മുന്നോട്ടു പോകുമ്പോള്‍ കേന്ദ്രം ഭരിക്കുന്നത്‌ ബിജെപിയാണെന്ന കാരണം പറഞ്ഞ് രക്ഷപ്പെടാനാണോ പ്രവാസി സംഘടനകള്‍ തീരുമാനിച്ചിട്ടുള്ളത്‌?. അതിനാല്‍ മത - രാഷ്ട്രീയ - സാമൂഹ്യ - സാംസ്കാരിക സംഘടനകളുടെ വലുപ്പ ചെറുപ്പവും പ്രവര്‍ത്തന ശൈലികളും നോക്കാതെ ഒരേ മേശക്ക് ചുറ്റുമിരുത്തി ഭാവി കര്‍മ്മപരിപാടികള്‍ ആസൂത്രണം ചെയ്തുകൊണ്ടുള്ള ജനകീയ മുന്നേറ്റത്തിലൂടെ മാത്രമേ ഇതേപോലുള്ള വിഷയങ്ങള്‍ക്ക് പരിഹാരം കാണാന്‍ സാധിക്കൂ. 

നേതാക്കന്മാരുടെ അഭിപ്രായപ്രകടനങ്ങളും പ്രസ്താവനകളും മാത്രം കേട്ടിരുന്നാല്‍ മലപ്പുറം, പാലക്കാട് ജില്ലക്കാര്‍ക്ക് ഏറെ ആശ്വാസമായിരുന്ന മലപ്പുറത്തെ എയര്‍ ഇന്ത്യ ഓഫീസ് നഷ്ടപ്പെട്ടതുപോലെ കോഴിക്കോട് വിമാനത്താവളവും പാവപ്പെട്ട പ്രവാസികള്‍ക്ക് ഉപകാരപ്പെടാത്ത അവസ്ഥയിലേക്ക് മാറുന്ന കാലം അതിവിദൂരമല്ല. (Published in Thejas Daily 14-3-15)

ഇവര്‍ ഇനിയും നമ്മെ ഭരിക്കും

പതിനാറാം ലോക സഭ തെരഞ്ഞെടുപ്പാഘോഷം അതിന്‍റെ പാരമ്യതയില്‍ എത്തിനില്‍ക്കുകയാണല്ലോ. ജനാധിപത്യത്തിന്‍റെ ശ്രീകോവില്‍ എന്നറിയപ്പെടുന്ന നിയമ നിര്‍മ്മാണ സഭകളില്‍ വന്‍ കോര്‍പ്പറേറ്റ് മുതലാളിമാരുടെ ദല്ലാള്‍മാരുടെയും ക്രിമിനലുകളുടെയും എണ്ണം നാള്‍ക്കുനാള്‍ വര്‍ദ്ധിച്ചുകൊണ്ടിരിക്കുന്നതാണ് ഈ തിരെഞ്ഞെടുപ്പിലും കാണുന്നത് രാജ്യത്തെ മുഖ്യധാരാ രാഷ്ട്രീയ പാര്‍ട്ടികളുടെ മത്സരാര്‍ഥികളില്‍ അമ്പത്തിയാര്‍ സ്ഥാനാര്‍ത്ഥികള്‍ ക്രിമിനലുകളാണ്. ജനപ്രതിനിധി സഭകളില്‍ ക്രിമിനലുകള്‍ എത്തുന്നത്‌ തടയാന്‍ വേണ്ടി കുറ്റകൃത്യങ്ങളില്‍ കോടതി കുറ്റക്കാരാണെന്ന് കണ്ടെത്തി രണ്ടു വര്‍ഷമോ അതിലധികമോ ശിക്ഷിക്കപ്പെട്ടവരെ അയോഗ്യരാക്കുന്ന നിയമം കഴിഞ്ഞ ജൂലായിയില്‍ സുപ്രീകോടതി പുറപ്പെടുവിച്ചിട്ടും ഇതാണ് സ്ഥിതി. ഇപ്പോള്‍ നമ്മുടെ കേരളത്തിലെ 48% ജനപ്രതിനിധികളും ക്രിമിനല്‍കേസുകളില്‍ പെട്ടവരാണത്രേ.  ഇതേപോലുള്ള കോര്‍പ്പറേറ്റ് ഭീമന്‍മാര്‍ക്കും  കൊള്ളക്കാര്‍ക്കും അഴിമതി വീരന്‍മാര്‍ക്കും കൊലപാതകികള്‍ക്കും “രാഷ്ടീയ തൊഴിലില്‍” നിന്നും  റിട്ടയര്‍മെന്റ് തീരെയില്ല എന്നതാണ് മറ്റൊരു ഞെട്ടിപ്പിക്കുന്ന സത്യം.

രാജ്യത്തെ കോടിക്കണക്കിന് വിലയേറിയ വോട്ടര്‍മാര്‍ക്ക് തെരെഞ്ഞെടുപ്പുകള്‍ വരുമ്പോള്‍ വോട്ടു ചെയ്തുകൊടുക്കുന്ന പണിയല്ലാതെ അവരുടെതായ പ്രശ്നങ്ങള്‍ കാണാനോ പരിഹരിച്ചു കൊടുക്കാനോ മേല്‍ പറഞ്ഞ “ഏമാന്‍മാര്‍ക്ക്‌” സമയം തികയാറില്ല. ഇനി ഒറ്റപ്പെട്ടവല്ലവരും ചെയ്യുന്നുണ്ടെങ്കില്‍ അതവരുടെ ഉത്തരവാദിത്വം മാത്രമാണ്. അവരുടെ ഔദാര്യമല്ല. ഇത് തന്നെയാണ് പ്രവാസി പ്രശ്നങ്ങളിലും സംഭവിക്കുന്നത്.

ഗള്‍ഫില്‍ കാല്‍കുത്തുന്നത് മുതല്‍ നാട്ടിലെത്തുന്നത് വരെ നേതാക്കന്‍മാരെ താങ്ങി നടക്കുന്നവരെയും മാധ്യമങ്ങള്‍ക്ക് മുന്നിലെത്തുമ്പോള്‍ പ്രഖ്യാപനങ്ങളുടെ പെരുമഴ നടത്തി അണികളെ ആവേശം കൊള്ളിക്കുന്ന നേതാക്കളെയും മനസ്സിലാക്കാത്തിടത്തോളം കാലം പ്രവാസികളുടെ പ്രശ്നങ്ങള്‍ പരിഹരിക്കാന്‍ ഒരു തെരെഞ്ഞെടുപ്പ് മാമാങ്കങ്ങള്‍ക്കും സാധിക്കില്ലെന്ന് ഇനിയെങ്കിലും നാം മനസ്സിലാക്കുമോ? (G.Madhyamam 08 April 2014)

സൗദിയിലെ നിതാഖാത്ത്: മത - മഹല്ല് കൂട്ടായ്മകളും ഇടപെടണം

സൗദി അറേബ്യന്‍ ഗവര്‍മെന്റ് പുതുതായി കൊണ്ടുവന്ന നിതാഖാത്‌ പദ്ധതി പരിപൂര്‍ണാര്‍ഥത്തില്‍ നടപ്പാക്കുന്നതിന് തിരുഗേഹങ്ങളുടെ സേവകന്‍ അബ്ദുല്ലാ രാജാവ് നല്‍കിയ പ്രത്യേക ഇളവിന്റെ കാലാവധി ഈ മാസാദ്യം  അവസാനിച്ചു 2011 നവംബറിലാണ് സൗദി പരമോന്നത സഭ തൊഴില്‍നിയമ വ്യവസ്ഥ ക്രമീകരണ പദ്ധതിക്ക് തുടക്കം കുറിച്ചത്.. വിഷയത്തിന്‍റെ ഗൌരവം മനസ്സിലാക്കി സൗദി – ഇന്ത്യന്‍ വിദേശകാര്യാലയങ്ങളും ക്രിയാത്മകമായ ഇടപെടലുകളും മുന്നൊരുക്കങ്ങളും നടത്തികൊണ്ടിരിക്കുന്നതും സ്വാഗതാര്‍ഹമാണ്.

ഇളവ്‌ കാല പ്രഖ്യാപനത്തിനു ശേഷം ഹുറൂബില്‍ അകപ്പെട്ടവര്‍, ഇളവ്‌ കാലം മുഴുവന്‍ ആത്മാര്‍ഥമായി പരിശ്രമിച്ചിട്ടും രേഖകള്‍ ശരിയാക്കാന്‍ സാധിക്കാത്തവര്‍, ഇളവ്‌ കാലം കഴിയും വരെ തൊഴില്‍ സ്ഥാപനം രേഖകള്‍ വാങ്ങി വെക്കുകയും അവസാന ഘ്ട്ടത്തില്‍ കയ്യൊഴിഞ്ഞ് രേഖകള്‍ തിരിച്ചു കൊടുത്തവര്‍ ഇങ്ങനെയുള്ള ആയിരക്കണക്കിന് പ്രവാസി ഇന്ത്യക്കാര്‍ ഇനിയെന്ത് ചെയ്യണമെന്നറിയാതെ പ്രത്യാശയറ്റ് കഴിയുകയാണിവിടെ.

നാട്ടിലെ എല്ലാ മത സംഘടനകളുടെയും ഗള്‍ഫ് ചാപ്റ്ററുകള്‍, പ്രാദേശിക - സയുക്ത മഹല്ല് കമ്മിറ്റികള്‍, റിലീഫ്‌ കൂട്ടായ്മകള്‍ തുടങ്ങിയ നൂറുകണക്കിന് സംഘടനകള്‍ സൌദിയില്‍ വ്യവസ്ഥാപിതമായി പ്രവര്‍ത്തിച്ചു വരുന്നുണ്ട്. ഒരു വേള രാഷ്ട്രീയ സംഘടനകളേക്കാള്‍ പതിന്മടങ്ങ് ആള്‍ ശേഷിയും സാമ്പത്തിക ഭദ്രതയും സൗദി സര്‍ക്കാറിന്റെ പല കേന്ദ്രങ്ങളിലും സ്വാധീനമുള്ളവരുമാണ് പല സംഘടനകളും.

സാമൂഹ്യ ജീവിതത്തിലെ സാഹോദര്യ ബന്ധവും ഒരു സഹോദരന്‍റെ വിഷമം തീര്‍തത്തുകൊടുത്താല്‍ ലഭിക്കുന്ന പുണ്യത്തിന്റെ മികവും പഠിപ്പിച്ചുകൊടുക്കുന്ന മതസംഘടന പ്രതിനിധികളെയൊന്നും പ്രത്യാശയറ്റ് രാപകല്‍ ഭേദമന്യേ ആയിരക്കണക്കിന് പ്രവാസികള്‍ തടിച്ചുകൂടുന്ന തര്‍ഹീലുകള്‍, മറ്റു നയതന്ത്ര കാര്യാലയങ്ങള്‍ എന്നിവിടങ്ങളിലൊന്നും കണ്ടതേയില്ല. വിരലിലെണ്ണാവുന്നവര്‍ക്ക് ചിലയിടങ്ങളില്‍ നടത്തിയ സഹായ വിതരണവും ഏതാനും ദിവസങ്ങളില്‍ നടത്തിയ ഭക്ഷണ വിതരണവും മറക്കുന്നില്ല.

അതിനാല്‍ തങ്ങളുടെ അനുകൂല സാഹചര്യങ്ങള്‍ ഉപയോഗപ്പെടുത്തി പ്രവാസികളുടെ പ്രശ്നങ്ങളുമായി ഇത്തരം കേന്ദ്രങ്ങളില്‍ കയറിചെല്ലാനും കഷ്ടപ്പെടുന്നവരുടെ പ്രയാസങ്ങള്‍ പരിഹരിച്ച്‌ കൊടുക്കുന്നതിനുനു സഹായിക്കാനും ഇവിടത്തെ മത – മഹല്ല് - റിലീഫ് കൂട്ടായ്മകള്‍ മടിച്ചു നില്കുന്നത് എന്തുകൊണ്ടാണ്?. ഇത്തരം സേവനപ്രവര്‍ത്തനങ്ങളില്‍ വിരലിലെണ്ണാവുന്ന രാഷ്ട്രീയ സംഘടനകള്‍ മാത്രം ഇടപെട്ടാല്‍ മതിയോ?

ഏറെ കാലത്തെ കാത്തിരിപ്പിനും പ്രയാസങ്ങള്‍ക്കും ശേഷം രേഖകള്‍ ശരിയാക്കിയ ആയിരങ്ങള്‍  നമ്മുടെ ദേശീയ വിമാന കമ്പനിയുടെ കഴുത്തറപ്പന്‍ ചാര്‍ജ് കൂടി നല്‍കി കിട്ടിയ വണ്ടിക്കു നാടുപിടിച്ചതിനു ശേഷമാണെങ്കിലും സംസ്ഥാന സര്‍ക്കാര്‍ പ്രഖ്യാപിച്ച സൌജന്യ ടിക്കെറ്റ്, മറ്റാനുകൂല്യങ്ങള്‍ എന്നിവ അര്‍ഹതപ്പെട്ടവരുടെ ശ്രദ്ധയില്‍ കൊണ്ട് വരാനും അവര്‍ക്ക് മാത്രം ലഭ്യമാക്കാനും എല്ലാവരും രംഗത്തിറങ്ങേണ്ടതുണ്ട്.

കൂടാതെ ഭീമമായ സംഖ്യ കടവും ഒട്ടേറെ രോഗങ്ങളുമായി തിരിച്ചുപോകേണ്ടിവരുന്ന പ്രവാസിക്ക്‌ മഹല്ല് അടിസ്ഥാനത്തിലും മറ്റും പുനരധിവാസവും ഇതര സഹായങ്ങളും നല്‍കി ജിവിതം കരുപ്പിടിപ്പിക്കാനും അവസരത്തിനൊത്തുണര്‍ന്നു മുന്നിട്ടിറങ്ങാന്‍ നിങ്ങള്‍ക്കും ബാധ്യതയില്ലേ? പ്രവാസികളുടെ വിയര്‍പ്പും ആത്മാര്‍ഥമായ പരിശ്രത്തിന്‍റെ കൂടി ഫലമാണ് നാട്ടില്‍ ഇന്ന് വളര്‍ന്നു വലുതായ മത,സാംസ്കാരിക,വിദ്യാഭ്യാസ സ്ഥാപനങ്ങളുടെയും പ്രസിദ്ധീകരണളുടെയും വിജയരഹസ്യമെന്നത് ആരും മറക്കരുത്. (Published in Madhyamam  and Thejas 11&12- Nov 2013)

Pls Visit and LIKE : https://www.facebook.com/Janasamakshamblog

സൗദി ഔട്ട്‌പാസുകാരുടെ മടക്കയാത്ര: നാട്ടില്‍ നിന്നും മുറവിളി ഉയരണം

സൗദി അറേബ്യയിലെ പ്രവാസികള്‍ക്ക് അബ്ദുള്ള രാജാവ് പ്രഖ്യാപിച്ച വിവിധ നിലക്കുള്ള ഇളവുകള്‍ ഉപയോഗപ്പെടുത്തി ഏതാണ്ട് അര ലക്ഷത്തിലധികം പ്രവാസി ഇന്ത്യക്കാര്‍ അടുത്ത ജൂലായ്‌ മൂന്നിനു മുമ്പായി നാട്ടിലേക്ക്‌ എത്താനുള്ള അടിയന്തിര യാത്ര രേഖകള്‍ക്ക് വേണ്ടി ഇന്ത്യന്‍ നയതന്ത്ര കാര്യാലയങ്ങളുമായി ബന്ധപ്പെട്ട് കഴിഞ്ഞു. അവസരത്തിനൊത്ത് ഉണര്‍ന്ന്‌ കൊണ്ട് സൗദി – വിദേശകാര്യാലയങ്ങളും അനുകൂലമായ പല ചുവടുവെപ്പുകളും മുന്നൊരുക്കങ്ങളും നടത്തികൊണ്ടിരിക്കുന്നത് സ്വാഗതാര്‍ഹമാണ്.

ഇതുപോലൊരു ഇളവ്‌ ഇനി ഉണ്ടാകാന്‍ പോകുന്നില്ലെന്നും കഴിയുന്നത്രയും വേഗം രേഖകള്‍ ശരിയാക്കി സൗദിയില്‍ തന്നെ തുടരുകയോ അല്ലെങ്കില്‍ നാട്ടിലേക്ക് തിരിച്ചുപോകുകയോ ചെയ്യണമെന്നു മനസ്സിലാകുന്ന ഭാഷയിലും രീതിയിലുമൊക്കെ ബന്ധപ്പെട്ടവര്‍ ഉണര്‍ത്തികൊണ്ടിരിക്കുന്നുമുണ്ട്‌.  

ഇന്ത്യന്‍ എംബസി വിതരണം ചെയ്യുന്ന അടിയന്തിര യാത്ര രേഖ കൈപ്പറ്റി നാടുകടത്തല്‍ കേന്ദ്രത്തില്‍ നിന്നും എക്സിറ്റ്‌ വിസക്ക് ലഭിക്കുന്നവര്‍ എങ്ങിനെ നാട്ടിലെത്തും?. ഇപ്പോള്‍ത്തന്നെ വിമാന ടിക്കെറ്റ് കിട്ടാനില്ല. വേനല്‍ അവധി, റമദാന്‍ - ഉംറ സീസന്‍ കൂടി വരുന്നതോടെ കാര്യങ്ങള്‍ ഇതിലേറെ പ്രയാസമാകുമെന്നത് തീര്‍ച്ച. സ്വദേശത്തേക്ക് തിരിച്ചു പോകാന്‍ തയ്യാറായവര്‍ക്ക് സൗദി ഗവര്‍മെന്റ് പ്രഖാപിച്ച കാലാവധിക്ക് മുമ്പായി യാത്ര ചെയ്യാന്‍ കഴിഞ്ഞില്ലെങ്കില്‍ അതിന്‍റെ ഉത്തരവാദിത്വം ആരാേണറ്റെടുക്കുക.

ഗള്‍ഫിലെ ചില പ്രവാസി സംഘടനകള്‍ പതിവുപോലെ പത്ര പ്രസ്താവനകള്‍ നടത്തി മാറി നില്‍ക്കുന്നതാണ് കാണുന്നത്. വളരെ ഗുരുതരമായ ഈ വിഷയം നാട്ടിലെ മാതൃപ്രസ്ഥാനങ്ങള്‍ ഏറ്റെടുത്ത് ബന്ധപ്പെട്ട കേന്ദ്രങ്ങളില്‍ ശക്തമായ സമ്മര്‍ദ്ദം ചെലുത്തി മുന്നോട്ടു പോകേണ്ടതുണ്ട്. അല്ലെങ്കില്‍ ചൂടിന്റെ കാഠിന്യത്തോടൊപ്പം അനുദിനം ജയിലുകളും നാടുകടത്തല്‍ കേന്ദ്രങ്ങളും നിറഞ്ഞു കൊണ്ടിരിക്കുന്ന ഈ സമയത്ത് ജിദ്ദയിലെ കന്ദ്രപ്പാലം വീണ്ടും ഇന്ത്യക്കാരായ അനധികൃത താമസക്കാരാല്‍ നിബിഡമാകാന്‍ അധിക ദിവസം വേണ്ടി വരില്ല. സ്വന്തം പൌരന്മാരെ നാടിലെത്തിക്കാനും നാം രാജകാരുണ്യത്തിനായി കാത്തിരിക്കേണ്ടി വരുമോ?

 (Published in G.Thejas Daily 28-5-13)